డ్రాగ్ రేసులో టెస్లా సైబర్ ట్రక్ కు చుక్కలు చూపించిన పాత షివర్లే కారు!

ఆటోమొబైల్ ప్రపంచంలో ఆధునిక టెక్నాలజీకి ప్రతీకగా నిలిచే టెస్లా సైబర్‌ట్రక్‌కు డ్రాగ్ రేసులో ఊహించని పరాభవం ఎదురైంది. దాదాపు 50 ఏళ్ల క్రితం నాటి క్లాసిక్ అమెరికన్ మసిల్ కారు, 1970 మోడల్ షివర్లే చెవెల్ మాలిబు చేతిలో సైబర్‌ట్రక్ ఓటమి పాలైంది. ఎన్డీటీవీ ఆటో కథనం ప్రకారం, ఈ ఆసక్తికరమైన రేసు వీడియో ప్రస్తుతం సోషల్ మీడియాలో వైరల్ అవుతోంది.

క్వార్టర్ మైల్ (సుమారు 400 మీటర్లు) దూరానికి జరిగిన ఈ డ్రాగ్ రేసులో టెస్లాకు చెందిన అత్యంత శక్తిమంతమైన సైబర్‌బీస్ట్ వేరియంట్ పాల్గొంది. ఇది ట్రై-మోటార్ సెటప్‌తో 845 హార్స్‌పవర్ శక్తిని ఉత్పత్తి చేస్తుంది. మరోవైపు, రేసులో పాల్గొన్న షివర్లే చెవెల్ స్టాక్ కారు కాదు. డ్రాగ్ రేసుల కోసం ప్రత్యేకంగా మార్పులు చేసి, శక్తిమంతమైన V8 ఇంజిన్‌తో సిద్ధం చేశారు.

రేసు ప్రారంభమైనప్పుడు, షివర్లే డ్రైవర్ వేగంగా స్పందించి, మెరుగైన ట్రాక్షన్‌తో వెంటనే ఆధిక్యం సాధించాడు. ఎలక్ట్రిక్ పవర్ కారణంగా సైబర్‌ట్రక్ మధ్యలో వేగం పుంజుకుని, షివర్లేకు దగ్గరగా వచ్చినప్పటికీ, చివరికి స్వల్ప తేడాతో షివర్లేనే ముందుగా ముగింపు గీతను దాటింది.

సైబర్‌ట్రక్ డ్రైవర్ నెమ్మదిగా స్పందించడంతోనే షివర్లేకు ఆరంభంలో ఆధిక్యం లభించి, అదే దాని గెలుపునకు కారణమైంది. ఈ రేసు, ఆధునిక ఈవీ టెక్నాలజీకి, పాతకాలపు ఐసీఈ మసిల్ కార్ల ఇంజనీరింగ్‌కు మధ్య ఉన్న ఆసక్తికరమైన తేడాలను స్పష్టంగా చూపించింది.